Air India Dreamliner crashes into college hostel in Ahmedabad, leaving over 290 dead | ایئر انڈیا کا ڈریم لائنر احمد آباد کے کالج ہوسٹل سے ٹکرا گیا، 290 سے زائد افراد جاں بحق

Air India Dream liner crashes into college hostel in Ahmadabad

 

ایئر انڈیا کا ڈریم لائنر احمد آباد میں کالج ہوسٹل پر گر کر تباہ، 290 سے زائد افراد جاں بحق

احمد آباد: جمعرات کے روز ایئر انڈیا کا ایک بوئنگ 787-8 ڈریم لائنر طیارہ، جو لندن کے گیٹوک ایئرپورٹ جا رہا تھا، احمد آباد سے روانگی کے کچھ ہی منٹ بعد ایک میڈیکل کالج کے ہوسٹل پر گر کر تباہ ہو گیا، جس کے نتیجے میں 290 سے زائد افراد جاں بحق ہو گئے۔ حکام کے مطابق یہ گزشتہ ایک دہائی کا بدترین فضائی حادثہ ہے۔

طیارے میں کل 242 افراد سوار تھے، جن میں 217 بالغ مسافر، 11 بچے اور 2 شیر خوار شامل تھے۔ ایئر انڈیا کے مطابق ان میں 169 بھارتی، 53 برطانوی، 7 پرتگالی اور 1 کینیڈین شہری شامل تھے۔

حادثے میں ہلاک ہونے والوں میں زمین پر موجود افراد، میڈیکل کالج کے ہوسٹل میں رہائش پذیر طالبعلم اور عملہ بھی شامل ہیں۔ طیارہ دوپہر کے کھانے کے وقت ہوسٹل کی عمارت سے جا ٹکرایا، جس سے بی جے میڈیکل کالج کی ہاسٹل کی کینٹین مکمل طور پر تباہ ہو گئی۔

ریاستی پولیس افسر ودھی چودھری کے مطابق:

"تقریباً 294 افراد جاں بحق ہوئے ہیں، جن میں کچھ طلبہ بھی شامل ہیں کیونکہ طیارہ اس عمارت پر گرا جہاں وہ رہائش پذیر تھے۔"

پولیس کے مطابق حادثے میں کم از کم ایک مسافر معجزانہ طور پر زندہ بچ گیا ہے۔ 40 سالہ رمیش ویشواش کمار، جو نشست 11A پر سوار تھا، نے ہسپتال کے بستر سے بتایا:

"ٹیک آف کے 30 سیکنڈ بعد ایک زور دار دھماکہ ہوا اور طیارہ گر گیا۔ جب آنکھ کھلی تو ہر طرف لاشیں بکھری ہوئی تھیں، میں ڈر گیا اور بھاگ کھڑا ہوا۔ ایک شخص نے مجھے پکڑا اور ایمبولینس میں ڈال کر ہسپتال پہنچایا۔"

اس نے مزید بتایا کہ اس کا بھائی اجے طیارے میں کسی اور نشست پر تھا اور وہ اب لاپتہ ہے:

"وہ میرے ساتھ سفر کر رہا تھا، میں اسے تلاش نہیں کر پا رہا، برائے مہربانی میری مدد کریں۔"

شہر کے پولیس سربراہ جی ایس ملک نے بتایا کہ اب تک جائے حادثہ سے 204 لاشیں نکالی جا چکی ہیں، اور مزید زخمیوں کو ہسپتالوں میں منتقل کیا جا رہا ہے۔ ریاستی وزیر سی آر پٹیل کے مطابق جاں بحق ہونے والوں میں سابق وزیراعلیٰ وجے روپانی بھی شامل ہیں۔

ریاستی ہیلتھ سیکریٹری دھننجے دویدی کے مطابق متاثرہ علاقے میں احمد آباد سول اسپتال کے ہوسٹل، عملے کی رہائشگاہیں اور دیگر رہائشی مکانات موجود تھے۔ انہوں نے کہا کہ ان علاقوں کے رہائشی بھی زخمی ہوئے ہیں۔

جہاں طیارہ گرا وہاں اس کے پرزے ہر طرف بکھر گئے، اور اس کی دم عمارت کی چھت میں اٹکی ہوئی پائی گئی۔

سی این این نیوز 18 نے رپورٹ کیا کہ طیارہ بی جے میڈیکل کالج کی کینٹین پر گرا، جس سے متعدد میڈیکل طلبہ جان کی بازی ہار گئے۔

بوئنگ 787-8 ڈریم لائنر

حادثے کا شکار ہونے والا طیارہ بوئنگ 787-8 ڈریم لائنر تھا، جو جدید ترین مسافر طیاروں میں شمار ہوتا ہے۔

فلائٹ ریڈار 24 کے مطابق یہ طیارہ 2013 میں پہلی بار اڑا اور جنوری 2014 میں ایئر انڈیا کے حوالے کیا گیا۔

ایوی ایشن سیفٹی نیٹ ورک کے مطابق یہ ڈریم لائنر کی تاریخ میں پہلا مہلک حادثہ ہے۔

ریاستی حکام نے ہلاک شدگان کی شناخت کے لیے لواحقین سے ڈی این اے کے نمونے فراہم کرنے کی درخواست کی ہے، جبکہ جائے حادثہ اور اردگرد کے علاقوں کو محفوظ بنانے اور مزید لاشوں کی تلاش کا کام جاری ہے۔